أنا اسمى لينه, باعشق الطبيعة و الناس و ثقافات العالم. درست العلوم و عشت حياتى فى ثلاث قرات: افريقيا و امريكا الشمالية و اسيا. حاليا انا مقيمة فى جزيرة فى جنوب اليابان بقالى اكتر من سنتين. و لأنى بسافر كتير, دايما بيكون هدفى انى اندمج مع ثقافات البلاد اللى باعيش فيها. اللى دايما ألاحظه انه برغم الاختلافات الظاهرية بين الناس فى الشكل او اللغات او العادات و التقاليد, فى نمط متكرر. النمط المتكرر دة هو اللى بيخلينى اقدر افهم و اتعايش مع الناس باختلافاتهم, او بصورة اخرى, هو اللى بيخلينى اشوف التشابه اللى بينا و اللى اقدر من خلاله ان اتواصل معاهم و اقرب منهم و افهم وجهة نظرهم. فى كتابى, هتقرأوا معلومات عن بعض البلاد اللى عشت فيها, او ليا صلة قريبة بناس منها, و هتشوفوا ازاى ان برغم اختلاف كل بلد, فى نمط ثابت بيتكرر فى كل صفحة :)
الهدف من كتابى انى اشارك مع العالم العربى الثقافات المختلفة, فى نمط يوضح التشابه رغم الاختلاف...الكتاب معروض بشكل مبسط بحيث يستفيد منه جميع الاعمار, من الاطفال فى الابتدائى لكبار السن. ان شاء الله يعجبكوا :)
