الكتاب بيستعرض الجانب النفسى والدور اللى بيلعبه الشخص اللى بيتولى رعاية حد من أهله. الكتاب مبنى على تجربتى الشخصية في رعاية مامتى الحقيقة فكرة الكتاب جاتلى لما أمى " بطوطة" إبتدت تحتاج جليسة بعد تعب إتعرضت له وكانت الأمور إستقرت بس كان لازم يبقى حد معاها يونسها وبردة ياخد باله منها ويشوف لو إحتاجت حاجة لحد لما أرجع من شغلى. الفكرة جاتلى من مغامراتنا مع الجليسات اللى كل واحدة كانت شخصية وكل واحدة كانت بحكاية. الحقيقة لما بطوطة تعبت تعبها الأخير جاتلى فكرة إنى أعمل كتاب يبقى أعمق ويتعرض للجانب النفسى اللى بيقدم الرعاية لحد من أهله واللى بيقى أكتر واحد محتاج للدعم وفكرت انى أتكلم عن تجربتى وحكايات الجليسات في فترة التعب الأخيرة لأمى " بطوطة وفاكرة كويس كانت في المستشفى وكان كلامها إبتدى يبقى قليل قعدت جنبها على سريرها في المستشفى قولت لها بقولك إية يا بطوطة ، أنا هكتب كتاب عنك. إبة رأيك ؟ أسميه " خلى بالك من بطة" ولا " خلى بالك من بطوطة" بصبتلى وردت عليا و قالت " بطوطة" دة حمسنى لفكرة الكتاب جدا جدا وقولت خلاص إسم الكتاب " خلى بالك من بطوطة" فكرة الكتاب بقت في رأسى وقلبى ومشاعرى وكمان بطوطة إختارت إسمه بس مكنتش عارفة إن الكتاب هيطلع للنور وبطوطة مش معانا الجزء الأول من الكتاب بيتكلم بشكل عام عن الضغوط والتجارب اللى بتعرض لها الشخص اللى بيرعى حد من أهله. الجزء دة مش كلام نظرى ، دة ملمس مع التجربة اللى عيشتها مع بطوطة لحد وفاتها كل كلمة كنت بكتبها من قلبى لأنى عيشت تفاصيلها عيطت كتير وأنا بكتب وإسترجعت حكايات ومواقف معينة رجعت ذكريات الماوقف اللى عيشتها بحذافيرها. بس الحقيقة الكتابة بردة بتريح وبتطلع مشاعر كتير ممكن متطلعش عن طريق الكلام بستعرض في الكتاب الضغوط والقلق النفسى اللى بيتعرض لها اللى بيتولى مسئولية أهله وإزاى ممكن نحاول نخف الضغط على نفسنا الجزء الثانى من الكتاب بستعرض فيه تجربتى في رعاية أمى مع التركيز على فترة تعبها الأخيرة. بستعرض في الكتاب نوادر ومغامرات جليسات وممرضات أمى كل واحدة من اللى إتعاملت معاها لها حكاية تنفع مسلسل لوحدها الجزء الثالث من الكتاب بيستعرض ألم فقد شخص عزيز ومحاولة تخطى ألم الفقد
