لما ماري أوزموند نظرت من نافذة الطائرة في رحلتها المهمة لمصر سنة ٢٠٦٢، مشهد أهرام الجيزة اللي بيُعاد بنائها كان مفاجئة غير متوقعة. دي كانت الأولى من سلسلة المفاجآت اللي هـتقابلها في امبراطورية مصر الوليدة اثناء مهمتها كأول سفيرة للولايات المتحدة الامريكية بعد ظهور الـنثرو. هيَّ مدركة لخطورة مهمتها في ظل الصدام المتوقع بين بلدها، اللي لسا خارجة من مشاكلها الداخلية، و مصر الجديدة اللي اصبحت إمبراطورية ضخمة في افريقيا. لكن في سعيها لفهم التغيرات اللي حصلت بسبب وجود الـنثرو علشان تمنع الصدام بين القوتين العالميتين، ماري هـتكتشف إن إختلال التوازن بين القوتين مش معناه هزيمة طرف في الصراع، لكن نهاية الحياة على كوكب الأرض جميعاً. سِفر الإشراق هو الجزء التاني من سلسلة هِرمِتِكا، و اللي بيسرد الأحداث الفترة بعد ظهور الـنثرو سنة ٢٠٥٦ (الجزء الاول: سِفر الرجوع) و حتى بعد وصول السفيرة ماري في ظل المواجهة بين القوتين العالميتين. خلال الفترة دي، هـنشوف إزاي مصر إتحولت الى إمبراطورية من خلال الاتباع المؤمنين بقدرات الـنثرو؛ منهم ابطال الجزء الاول اللي شهدوا تجلى الـنثرو من خلال رضا، و ابطال جدد هـيقودوا معاهم التغييرات الاسطورية في افكار الناس. أحداث الرواية ملحمية، من الصراع النفسي لسمية اللي منتظرة تبقى أم في ظل غياب حبيبها رضا و وجود خنتي.إمنتيو، الى الصراع الدولي بين مصر اللي بتتوسع كإمبراطورية و باقي دول العالم المرتبكة من التغيير؛ و بين المشهد الشخصي لسمية و الصراع العالمي، أحداث كتيرة هـتورينا التغيرات الفكريه و الاجتماعية في حياة الناس اللي عايشة في مصر و امبراطوريتها الجديدة. زي الجزء الاول، سِفر الإشراق لا يخلوا من المفاجآت المتوقعة من امتزاج فكرين مبدعين، إبداع عصر التكنولوچيا و إبداع الفكر المصري القديم الساحر و العميق.