حبيت وأنا بكتب الكتاب ده إني مخليهوش يُقرأ مرة واحدة بس وبعدين نركنه، إن شاء الله ده هيبقى من الكتب اللي هتحتفظي بيها في مكتبتك وإن شاء يكون مُعِين ليكي من وقت للتاني في الأوقات اللي هتبقي محتاجة فيها لدعم نفسي، کتبالك خلاصة مهارات ونصايح قريتها وخبرات اتعلمتها من شخصيات في حياتي مؤثرة وعيشتها من خلال تجربتي المتواضعة ورحلة الوعي اللي استمتعت بكل تفاصيلها أثناء دراستي للصحة النفسية - دراسة الصحة النفسية من وجهة نظري عامل زي التشريح ولكن هذا التشريح نفسي... وخدي بالك إن الصحة النفسية متقلش أهمية نهائي عن الصحة الجسدية لأن سلامتك النفسية هي أول خطوة في طريقك للسعادة الحقيقية في الحياة - زي بالظبط سلامتك الجسدية فالروح والجسد جزء لا يتجزأ كل واحد يدعم الآخر... ناس كتير فاكرة إن الصحة النفسية دي تعتبر من الرفاهيات ولكن زي ما ذكرت من شوية إن أهميتها متقلش نهائي عن الصحة الجسدية إن مكانش أكتر كمان علشان كده هي تعتبر في مقدمة الأولويات، السلامة النفسية من وجهة نظري هي إكسير الحياة اللي بتخليكي تواجهي أي معركة نفسية وتهزميها. كتبت المهارات دي هنا افهميها وطبقيها في حياتك واتعلمي منها وإن شاء الله تقدري تستفيدي من المهارات دي و يكون كتاب معين ليكي، أتمنى إن ربنا يقدرني ويوفقني وأقدر بالكتاب ده إني يكون لي بصمة وأساعد ولو حتى شخص واحد بس في إنه يحسن ويطور من نفسه وتتغير حياته للأفضل ويقدر من خلال قرائته للكتاب إنه يقدم رفاهية مختلفة لنفسه ، أتمنى أن أترك أثر طيب في قلب من يقرأ هذا الكتاب وأن يكون كتابي السبب في إنه يُسعد ولو يوم واحد فقط من حياة شخص.......
